ಭಾರತದಂತಹ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶದಲ್ಲಿ ಎಲ್ಲರಿಗೂ ಕೆಲಸ ಸಿಗುವುದು ಅಸಾಧ್ಯ. ಸರಕಾರ ಕೂಡ ಈ ವಿಷಯದಲ್ಲಿ ಏನೂ ಮಾಡಲಾಗದು. ನಮ್ಮ ದೇಶದಲ್ಲಿ ಸಣ್ಣ ಉದ್ದಿಮೆದಾರರ ಮತ್ತು ಸ್ವಂತ ಕೆಲಸವನ್ನು ಮಾಡುವವರ ಸಂಖ್ಯೆ ಬಹಳವಿದೆ. ಬದುಕಿನ ಬಂಡಿ ಹೊಡೆಯಲು ಏನಾದರೂ ಮಾಡಬೇಕಲ್ಲ! ಹೀಗಾಗಿ ಇಂತಹ ಉದ್ದಿಮೆಗಳು ಭಾರತದ ಜಿಡಿಪಿಯ 40 ಪ್ರತಿಶತವನ್ನು ಪ್ರತಿನಿಧಿಸುತ್ತದೆ ಎನ್ನುವುದು ಅದರ ಮಹತ್ವವನ್ನು ತಿಳಿಸುತ್ತದೆ.
ಇವುಗಳಲ್ಲಿ ಕೂಡ ಒಂದಷ್ಟು ದೊಡ್ಡ ಮಟ್ಟದ ವ್ಯಾಪಾರ ನಡೆಸುವ ಸಂಸ್ಥೆಗಳಿಗೆ ವ್ಯಾಪಾರದಲ್ಲಿ ನೋಡಬೇಕಾದ ಅಂಶಗಳ ಬಗ್ಗೆ ಮಾಹಿತಿ ಸಿಗುತ್ತದೆ. ಆಯಾ ವಲಯದ ತಜ್ಞರನ್ನು ಅವರು ಸಲಹೆ ಕೇಳುವ ಮತ್ತು ಅವರ ಶುಲ್ಕವನ್ನು ಬರಿಸುವ ಶಕ್ತಿಯನ್ನು ಕೂಡ ಹೊಂದಿರುತ್ತಾರೆ. ಆದರೆ ಈ ವಲಯದಲ್ಲಿ ಬಹಳಷ್ಟು ಜನರಿಗೆ ಇದರ ಬಗ್ಗೆ ಮಾಹಿತಿ ಕೂಡ ಇರುವುದಿಲ್ಲ. ಬದುಕು ಸಾಗಿಸಲು ವ್ಯಾಪಾರ, ಸೇವೆ ನೀಡಬೇಕು ಎನ್ನುವ ದರ್ದಿಗೆ ಬಿದ್ದು ಕೆಲಸವನ್ನು ಮುಂದುವರಿಸುತ್ತಿರುತ್ತಾರೆ.
ಈಗಾಗಲೇ ಈ ರೀತಿ ಉದ್ದಿಮೆ ನಡೆಸುತ್ತಿರುವವರು ಮತ್ತು ಹೊಸದಾಗಿ ತಮ್ಮ ಉದ್ದಿಮೆ ಅಥವಾ ಸ್ವಂತ ಕೆಲಸವನ್ನು, ಸೇವೆಯನ್ನು ನೀಡ ಬಯಸುವವರು ಮೊದಲಿಗೆ ವ್ಯಾಪಾರಕ್ಕೆ ಸಂಬಂಧಿಸಿದ ಒಂದಷ್ಟು ಅಂಶಗಳನ್ನು ತಿಳಿದುಕೊಳ್ಳುವುದು ಉತ್ತಮ. ಆ ನಿಟ್ಟಿನಲ್ಲಿ ಕೆಳಗಿನ ಕೆಲ ಅಂಶಗಳ ಬಗ್ಗೆ ತಿಳುವಳಿಕೆ ಪಡೆದುಕೊಳ್ಳುವುದು ಅತಿ ಮುಖ್ಯ.
ರಿಟರ್ನ್ ಆನ್ ಇನ್ವೆಸ್ಟ್ಮೆಂಟ್: ಈ ಅನುಪಾತವನ್ನು ಪ್ರತಿಶತದಲ್ಲಿ ಹೇಳಲಾಗುತ್ತದೆ. ನಿವ್ವಳ ಆದಾಯವನ್ನ ಒಟ್ಟು ಇನ್ವೆಸ್ಟ್ಮೆಂಟ್ ಮತ್ತು ಅದಕ್ಕಾಗಿ ತಲುಗಿದ ಖರ್ಚನ್ನ ಕೂಡ ಸೇರಿಸಿ ಅದರಿಂದ ಭಾಗಿಸಿ ಬರುವ ಬಾಗಲಬ್ದವನ್ನ 100 ರಿಂದ ಗುಣಿಸಿದಾಗ ಬರುವ ಉತ್ತರವನ್ನ ROI ಎನ್ನಲಾಗುತ್ತದೆ. ಇದು ಹೆಚ್ಚಿದಷ್ಟು ಒಳ್ಳೆಯದು, ಆದರೆ 7 ಪ್ರತಿಶತಕ್ಕಿಂತ ಹೆಚ್ಚಿದ್ದರೆ ಉತ್ತಮ , ಅದಕ್ಕಿಂತ ಜಾಸ್ತಿಯಿರುವುದರ ಮೇಲೆ ಹೂಡಿಕೆ ಮಾಡಬೇಕು. ಇದಕ್ಕಿಂತ ಕಡಿಮೆ ಇದ್ದಲ್ಲಿ ಹೂಡಿಕೆ ಮಾಡುವುದು ಅಷ್ಟು ಸಮಂಜಸವಲ್ಲ.
ಉದಾಹರಣೆ ನೋಡೋಣ. ನೆಟ್ ಇನ್ಕಮ್ 10, ಕಾಸ್ಟ್ ಆಫ್ ಇನ್ವೆಸ್ಟ್ಮೆಂಟ್ 100 ಇದ್ದು ಭಾಗಿಸಿದಾಗ ಬರುವ ಭಾಗಲಬ್ಧ 0.10 ಇದನ್ನ 100 ರಿಂದ ಗುಣಿಸಿದರೆ 10% ವನ್ನು ROI ಎನ್ನಬಹುದು. ಭಾಗಲಬ್ಧ 7 ಕ್ಕಿಂತ ಹೆಚ್ಚಿದ್ದರೆ ಹೂಡಿಕೆಗೆ ಉತ್ತಮ.
Return On Advertising Spend: ನಾವೆಲ್ಲಾ ನಾವು ಹೂಡಿದ ಹಣದ ಮೇಲೆ ಎಷ್ಟು ಲಾಭ ಪಡೆದೆವು ಎನ್ನುವುದನ್ನು ನೋಡುತ್ತೇವೆ. ಅಲ್ಲಿ ಲಾಭವೂ ಬಂದಿರಬಹುದು. ಆದರೆ ಆ ಲಾಭ ಅದೆಷ್ಟು ಹಣವನ್ನು ಜಾಹಿರಾತಿಗೆ ಖರ್ಚು ಮಾಡಿ ಗಳಿಸಿದ್ದೇವೆ ಎನ್ನುವುದರ ಜೊತೆಗೆ ಜಾಹಿರಾತಿಗೆ ಖರ್ಚು ಮಾಡಿದ ಹಣದ ಕಾರಣ ಅದೆಷ್ಟು ರೆವೆನ್ಯೂ ಬಂದಿತು ಎನ್ನುವುದನ್ನು ಕೂಡ ಲೆಕ್ಕ ಹಾಕಬೇಕಾಗುತ್ತದೆ.
ವರ್ಕಿಂಗ್ ಕ್ಯಾಪಿಟಲ್: ಇದು ಸಂಸ್ಥೆ ಯಾವ ಮಟ್ಟದಲ್ಲಿ ತನ್ನ ಬಂಡವಾಳವನ್ನ ತನ್ನ ಅಭಿವೃದ್ಧಿಗೆ ಬಳಕೆ ಮಾಡಿಕೊಳ್ಳುತ್ತಿದೆ ಎನ್ನುವುದನ್ನ ತೋರಿಸುತ್ತದೆ. ಇದು ಹೆಚ್ಚಾಗಿದ್ದರೆ ಸಂಸ್ಥೆ ಉತ್ತಮವಾಗಿ ಬಂಡವಾಳವನ್ನ ಉಪಯೋಗ ಮಾಡಿಕೊಳ್ಳುತ್ತಿದೆ ಎಂದರ್ಥ. ಕಡಿಮೆಯಿದ್ದರೆ ಬಂಡವಾಳದ ಕೊರತೆ ಅಥವಾ ಸರಿಯಾದ ಬಳಕೆಯಾಗಿತ್ತಿಲ್ಲ ಎನ್ನುವುದನ್ನ ಈ ಅನುಪಾತ ಹೇಳುತ್ತದೆ. ಆದರೆ ಇದು ಬಹಳ ಹೆಚ್ಚಾದರೂ ಅಪಾಯ, ಬಹಳ ಕಡಿಮೆಯಾದರೂ ಅಪಾಯ. ಹೀಗಾಗಿ 1 ರಿಂದ 2 ರ ಅನುಪಾತವನ್ನ ಉತ್ತಮ ಅನುಪಾತ ಎನ್ನಬಹುದು. ಉದಾಹರಣೆ ನೋಡೋಣ:
ನೆಟ್ ಸೇಲ್ಸ್ 100 ಮತ್ತು ವರ್ಕಿಂಗ್ ಕ್ಯಾಪಿಟಲ್ 70 ಇದ್ದರೆ ಆಗ 100/70 = 1.43 ಆಗುತ್ತದೆ. 1 ರಿಂದ 2ರ ಅನುಪಾತವನ್ನ ಉತ್ತಮ ಅನುಪಾತ ಎನ್ನಬಹುದು.
ಹೊಸ ವಿಶ್ವ ವ್ಯವಸ್ಥೆಗೆ ಜಗತ್ತು ಸಿದ್ಧವಾಗಿದೆಯೇ? (ಹಣಕ್ಲಾಸು)
ಪ್ರಾಫಿಟ್ ಮಾರ್ಜಿನ್: ಒಟ್ಟು ಮಾರಾಟದಿಂದ ಎಷ್ಟು ಪ್ರತಿಶತ ಲಾಭವನ್ನ ಸಂಸ್ಥೆ ಕಂಡಿದೆ ಎನ್ನುವುದನ್ನ ಇದು ತಿಳಿಸುತ್ತದೆ. ಇದು ಹೆಚ್ಚಿದಷ್ಟು ಒಳ್ಳೆಯದು. ಕಡಿಮೆಯಾದಷ್ಟೂ, ಕೆಲಸ ಹೆಚ್ಚು ಲಾಭ ಕಡಿಮೆ ಎನ್ನುವುದನ್ನ ಇದು ತೋರಿಸುತ್ತದೆ. ಉದಾಹರಣೆಗೆ ಎಲ್ಲಾ ಖರ್ಚು ತೆರಿಗೆ ಇತ್ಯಾದಿಗಳನ್ನ ಕೊಟ್ಟು ನಂತರ ಉಳಿದ ನಿವ್ವಳ ಲಾಭವನ್ನ ಒಟ್ಟು ಮಾರಾಟದಿಂದ ಭಾಗಿಸಿ ಬರುವ ಭಾಗಲಬ್ದವನ್ನ 100 ರಿಂದ ಗುಣಿಸಿದಾಗ ಬರುವ ಉತ್ತರ ಪ್ರತಿಶತ ಅಥವಾ ಪರ್ಸಂಟೇಜ್ ನಲ್ಲಿರುತ್ತದೆ. ನೂರಕ್ಕೆ ಎಷ್ಟು ಪರ್ಸೆಂಟ್ ಲಾಭ ಎನ್ನುವುದನ್ನ ಇದು ತೋರಿಸುತ್ತದೆ.
ಬ್ರೇಕ್ ಈವನ್ ಪಾಯಿಂಟ್: ಯಾವಾಗ ಒಂದು ವ್ಯಾಪಾರದಲ್ಲಿನ ಖರ್ಚು ಮತ್ತು ಆದಾಯ ಸಮವಾಗುತ್ತದೆ, ಅಂತಹ ಸನ್ನಿವೇಶವನ್ನು ಬ್ರೇಕ್ ಈವನ್ ಎನ್ನಲಾಗುತ್ತದೆ. ಇದರರ್ಥ ಸಂಸ್ಥೆಯ ವಹಿವಾಟಿನಿಂದ ಸಂಸ್ಥೆಗೆ ಲಾಭವೂ ಆಗಿಲ್ಲ, ನಷ್ಟವೂ ಆಗಿಲ್ಲ ಎಂದಾಗುತ್ತದೆ. ಸಂಸ್ಥೆಯ ಪ್ರಾರಂಭಿಕ ಹಂತದಲ್ಲಿ ಈ ರೀತಿಯ ಸನ್ನಿವೇಶವನ್ನು ಒಪ್ಪಿಕೊಳ್ಳಬಹುದು. ಆದರೆ ಆ ನಂತರ ಲಾಭಗಳಿಸ ಬೇಕಾಗುತ್ತದೆ. ಈ ಸನ್ನಿವೇಶದಲ್ಲಿ ಸಂಸ್ಥೆ ಹೆಚ್ಚು ಕಾಲ ನಡೆಯಲು ಸಾಧ್ಯವಿಲ್ಲ.
ರೆವೆನ್ಯೂ ರನ್ ರೇಟ್: ನಿಗದಿತ ಸಮಯದಲ್ಲಿ ಎಷ್ಟು ರೆವೆನ್ಯೂ ಬಂದಿದೆ ಎನ್ನುವುದರ ಆಧಾರದ ಮೇಲೆ ವಾರ್ಷಿಕ ಎಷ್ಟು ರೆವೆನ್ಯೂ ಆಗಬಹುದು ಎಂದು ಅಂದಾಜಿಸುವುದಕ್ಕೆ ರೆವೆನ್ಯೂ ರನ್ ರೇಟ್ ಎನ್ನಲಾಗುತ್ತದೆ. ಉದಾಹರಣೆಗೆ ಒಂದು ವಾರದಲ್ಲಿ ಸಂಸ್ಥೆ 20 ಸಾವಿರ ರೂಪಾಯಿ ರೆವೆನ್ಯೂ ಜನರೇಟ್ ಮಾಡಿದ್ದರೆ ಆಗ 20 ಸಾವಿರವನ್ನು 7 ರಿಂದ ಭಾಗಿಸಬೇಕು. ಭಾಗಲಬ್ಧ 2857.15 ಇದನ್ನು 365ರಿಂದ ಗುಣಿಸಬೇಕು ಆಗ ಬರುವ ಫಲಿತಾಂಶ 10,42,857/- ಇದನ್ನು ರೆವೆನ್ಯೂ ರನ್ ಎನ್ನಬಹುದು.
ಅರ್ನಿಂಗ್ ಬಿಫೋರ್ ಇಂಟರೆಸ್ಟ್ ಅಂಡ್ ಟ್ಯಾಕ್ಸ್: ಇದನ್ನು ಎರಡು ವಿಧದಲ್ಲಿ ಲೆಕ್ಕ ಹಾಕಬಹುದು ಒಂದು, EBIT = Total revenue – Cost of goods sold – Operating expenses. ಮತ್ತು ಎರಡನೆಯ ರೀತಿ : EBIT = Net income + Taxes + Interest. ಸಂಸ್ಥೆ ತನ್ನ ಸಾಲಗಳ ಮೇಲೆ ನೀಡುವ ಬಡ್ಡಿ ಮತ್ತು ಲಾಭದ ಮೇಲಿನ ತೆರಿಗೆಗೆ ಮುಂಚೆ ಎಷ್ಟು ಆದಾಯವನ್ನು ಹೊಂದಿದೆ ಎನ್ನುವುದು ಅತ್ಯಂತ ಮುಖ್ಯ ಮಾಹಿತಿ. ಇದನ್ನು ತಿಳಿದುಕೊಂಡರೆ ವ್ಯಾಪಾರದ ನಿಜವಾದ ಶಕ್ತಿಯ ಪರಿಚಯ ಕೂಡ ಆಗುತ್ತದೆ. ಹೀಗಾಗಿ ಈ ಮಾಹಿತಿ ತಿಳಿದುಕೊಳ್ಳುವುದು ಅಗತ್ಯವಾಗಿದೆ.
Deepseek: ಮಾರುಕಟ್ಟೆಗೆ ಕೊಟ್ಟಿದೆ ಡೀಪ್ ಶಾಕ್! (ಹಣಕ್ಲಾಸು)
ಕೊನೆ ಮಾತು: ಮೇಲೆ ಹೇಳಿದ ಏಳು ಅಂಶಗಳು ತೀರಾ ಮೂಲಭೂತವಾಗಿ ವ್ಯಾಪಾರಸ್ಥರು ತಿಳಿದುಕೊಂಡಿರಬೇಕಾದ ಅಂಶಗಳು. ಇದರ ಜೊತೆಗೆ ಇನ್ನಷ್ಟು ಅಂಶಗಳನ್ನು ಕೂಡ ತಿಳಿದುಕೊಳ್ಳಬೆಳಗುತ್ತದೆ. ಆದರೆ ಒಟ್ಟಾರೆ ಇವುಗಳ ಬಗ್ಗೆ ಮಾಹಿತಿ ಇಲ್ಲದೆ ಹೆಜ್ಜೆ ಇಡುವಂತಿಲ್ಲ. ಗಮನಿಸಿ ನೋಡಿ ಸಾಮಾನ್ಯವಾಗಿ ನೂರರಲ್ಲಿ 90ಕ್ಕೂ ಹೆಚ್ಚು ವ್ಯಾಪಾರಗಳು ಮೊದಲ ಒಂದು ವರ್ಷದಲ್ಲಿ ಮುಚ್ಚಿ ಹೋಗುತ್ತವೆ. ಇದಕ್ಕೆ ಕಾರಣ ಮಾಹಿತಿಯಿಲ್ಲದೆ ವ್ಯಾಪಾರಕ್ಕೆ ಧುಮುಕುವುದು. ಎಲ್ಲಕ್ಕೂ ಮೊದಲು ನಾವು ಶುರು ಮಾಡಬೇಕಾಗಿರುವ ವ್ಯಾಪಾರಕ್ಕೆ ಎಷ್ಟರ ಮಟ್ಟಿನ ಬೇಡಿಕೆಯಿದೆ. ಎಲ್ಲಿ ಶುರು ಮಾಡಬೇಕು ಎಂದಿದ್ದೇವೆ ಮತ್ತು ಅಲ್ಲಿನ ಸ್ಪರ್ಧೆ ಹೇಗಿದೆ. ಇಂತಹ ಮೂಲಭೂತ ಮಾಹಿತಿಯನ್ನು ತಿಳಿದುಕೊಳ್ಳದೆ ಹೂಡಿಕೆ ಮಾಡಬಾರದು. ಇದರ ಜೊತೆಗೆ ನಾವು ಶುರು ಮಾಡುವ ವ್ಯಾಪಾರ ಅಥವಾ ಸೇವೆ ನಮ್ಮ ಗುಣಕ್ಕೆ, ವ್ಯಕ್ತಿತ್ವಕ್ಕೆ ಹೊಂದುತ್ತದೆಯೇ ಎನ್ನುವುದನ್ನು ಕೂಡ ಪರಿಶೀಲಿಸ ಬೇಕಾಗುತ್ತದೆ. ಇವೆಲ್ಲವುಗಳ ತಿಳುವಳಿಕೆ ಇಲ್ಲದೆ ವ್ಯಾಪಾರ ಮಾಡಬೇಕು ಎನ್ನುವ ಹಠಕ್ಕೆ ಬಿದ್ದು ವ್ಯಾಪಾರ ಶುರು ಮಾಡಬಾರದು. ಆದರೆ ನೆನಪಿರಲಿ ವ್ಯಾಪಾರ ಅಥವಾ ಸ್ವಂತ ಕೆಲಸ ಮಾಡದೆ ಬೇರೆ ದಾರಿಯೂ ಇಲ್ಲ.
